Giklaro ni Padayon Pilipino-Centrist Democratic Party ug bag-ong Cagayan coalition head Pompee La Viña nga wala kini miingon nga iyang tugotan ang katawhan nga subling mamaligya kilid sa merkado sa Cogon.
Kabaliktaran sa mikatag nga pekeng balita ang gustong mahitabo sa opisyal. Giangkon niini nga iyang hatagan sa higayon ang katawhan nga makabaligya sa ilang mga abot apan angay unang pangitaan sa maayong lokasyon aron dili makababag sa dalan o ba kaha mamahimo unyang hinungdan sa kagubot.
Gani, gusto sa opisyal nga mangita og area kung asa pwede himoong tourist spot ug mamahimong plastaran sa mga sidewalk vendors.
Samtang, kung buligan sa kahigayunan nga mamahimong mayor dinhi sa dakbayan, dili matud pa kalimtan sa opisyal nga atimanon ang hut-ong sa mga mamaligyaay tungod kay alang kaniya, ang ginagmay nga kwarta gikan sa maayong pamaagi mas bililhon pa kaysa dinagko nga kita apan gikan sa daotan nga binuhatan.
Gisaysay pa ni La Viña nga duna kini pagbati alang sa mga mamaligyaay kay bisan siya kaniadto sa nagtungha pa sa elementarya nagsugod na man sa pagbaligya aron dunay ikadugang sa iyang balon.
Sa laing bahin, gipahimangnoan pa niini ang publiko nga dili dayun basta motoo sa mga post nga ipakatag sa social media. (CDP)
(Source: Mindanao Eagles Facebook page)