Misaka na sa 79% ang nabakunahan sa ilang first dose sa COVID-19 vaccine sa lalawigan sa Misamis Oriental atol sa gipahigayon nga duha ka semana nga vaccination roll out sa tibuok probinsya niadtong Nobiyembre 15 ngadto Nobiyembre 26, ning tuig.
Pasabot nga sulod target eligible population sa probinsya nga 681, 571 aduna nay 539, 127 kanila ang malampuson nga nabakunahan sa ilang first dose hinungdan nga kung sila mabakunahan sa ilang 2nd dose, makab-ot na sa probinsya ang gipaninguha nga 70% herd immunity.
Stratehiya sab sa Provincial IATF ug panggamhanan sa lalawigan nga pasidunggan ang mga Local Government Units sa probinsya nga adunay pinaka-taas nga porsiyento sa nabakunahan nga gikategorya base sa ilang populasyon.
Sulod sa 5,000-15,000 population pinaka-taas ang munisipyo sa Libertad sa ilang 45.46%, samtang sa 15,000-20,000 population nanguna ang munisipyo sa Lagonglong sa ilang 32. 16%, nasakmit sab sa munisipyo sa Medina ang kadaogan sa ilang 41.36% sulod sa 20,000-26,000 population, nanguna sab ang munisipyo sa Medina sulod sa 26,000-45,000 population nga adunay 42.23% ug ang munisipyo sa Tagoloan sulod sa 45,000-100,000 population sa ilang 32. 50%.
Sa kinatibuk-ang ihap, sukad sa bulan sa Marso diin gisugdan ang pagbakuna sa katawhan sa lalawigan, nasakmit sa munisipyo sa Libertad ang 98.18% sa kategorya nga 5,000-15,000 population, pareho sab nga nakasakmit og 82% ang munisipyo sa Naawan ug Laguindingan sulod sa 15,000-20,000 population, samtang sulod sa 20,000-26,000 population nakab-ot sa munisipyo sa Medina ang 90.88%, ug ang munisipyo sa Villanueva sa ilang 95.26% sulod sa 26,000-45,000 population , samtang nanguna ang munisipyo sa Balingasag sa ilang 74.05% sulod sa 45,000-100,000 population.
Pinaagi sa pagtinabanga sa panggamhanan sa lalawigan pinangunahan ni Gobernador Bambi ug sa Provincial IATF pinangulohan ni Dr. Jerie Calingasan malampuson ang kampanya sa pagbakuna batok sa COVID-19 sa tibuok probinsya rason nga hingpit na nga makab-ot ang herd immunity ug sa labing-daling panahon hinay-hinay nga mabalik ang klase sa kinabuhi nga nasinati sa wala pa ang pandemya. (Reymark Carreon Semaña)
(Source: Misamis Oriental Provincial Information Office Facebook page)