Nagkahiusa ang mga karate athletes, coaches ug tournament officials gikan sa nagkalain-laing bahin sa Visayas ug Mindanao alang sa 1st Mayor Marissa Manigsaca VIS-MIN Open Karate Championship 2026, nga opisyal nga giablihan niadtong Septiyembre 5,2026 didto sa Perfecto C. Cebedo Cultural and Sports Center sa Rizal, Zamboanga del Norte.
Gitambongan ni Mayor Marissa Manigsaca ang opening ceremony diin giabiabi niini ang mga delegasyon nga miabot sa lungsod aron makigkompetensya sa maong sports event.
Sa iyang mensahe, gipasiugda ni Mayor Manigsaca ang kamahinungdanon sa sports isip usa ka paagi sa pagpalambo sa disiplina, determinasyon ug maayong relasyon tali sa mga atleta ug mga komunidad nga ilang girepresentahan.
Gipakita usab sa lokal nga panggamhanan ang suporta niini pinaagi sa pagtambong ni Vice Mayor Jose B. Salac ug Sangguniang Bayan Member Al Manigsaca sa seremonya sa pag-abli.
Ang maong kompetisyon gitumong dili lamang sa pag-ila sa talento sa mga karateka, apan usab sa paghatag kanila og higayon nga mapalambo ang ilang kahanas pinaagi sa kompetisyon batok sa mga atleta gikan sa ubang lugar.
Gilauman nga mahimong kompetitibo ang duha ka adlaw nga kalihukan samtang mag-atubang ang mga partisipante sa nagkalain-laing mga kategoriya sa karate. Ilang ipakita ang teknikal nga abilidad, pisikal nga kaandam ug disiplina nga gikinahanglan sa maong martial art.
Nasayran nga ang 1st Mayor Marissa Manigsaca VIS-MIN Open Karate Championship 2026 gipahigayon gikan Septiyembre 5 hangtod 6, sugod alas 8:00 sa buntag, sa Perfecto C. Cebedo Cultural and Sports Center.
Pinaagi sa maong kalihukan, gilauman nga mas mapalig-on ang papel sa Rizal isip usa sa mga lugar nga naghatag og luna alang sa pagpalambo sa sports ug pagdasig sa mga batan-ong atleta sa pagpadayon sa ilang disiplina ug kompetisyon.(MEDALYN U. BORJA)
Source: Municipality of Rizal