Malampusong napahigayon ang tulo ka adlaw nga AJA 2.0 Skills Enhancement Training, usa ka capacity-building activity nga nagtumong sa pagpalig-on sa kahibalo ug praktikal nga kahanas sa mga health service providers sa pag-atiman ug paghatag og angay nga serbisyo ngadto sa mga adolescent nga gipahigayon niadtong Septiyembre 5,2026.
Atol sa training, gitutokan ang pagpalambo sa kapasidad sa mga partisipante aron mas masabtan ang nagkalain-laing panginahanglan sa mga kabatan-onan ug mas mapaayo ang paghatag og responsive, respetado ug adolescent-friendly health services.
Gipakita usab sa kalihukan ang importansya sa pagpalig-on sa koordinasyon ug teamwork tali sa mga personnel nga direktang nagserbisyo sa kabatan-onan. Gilauman nga ang mga nakat-unan gikan sa tulo ka adlaw nga sesyon magamit sa ilang tagsa-tagsa ka trabaho ug sa pagpaayo sa serbisyo sa komunidad.
Mitabang sa pagpahigayon sa training isip mga resource persons ug facilitators sila si Maureenuel U. Ortega, RN, LPT, Municipal Population Officer Designate, ug Jorelyn B. Curato, AHYD Coordinator. Ang ilang mga sesyon nakatabang sa paghimo sa mga diskusyon nga mas interaktibo ug praktikal alang sa mga partisipante.
Misalmot usab isip mga bisita ug resource persons gikan sa POPCOM sila si Geraldine S. Carin, PPO POPDEV Coordinator sa Zamboanga del Norte, ug Maria Teresa N. Paguibot, Provincial Population and Development Officer Designate, nga mipaambit sa ilang kahibalo ug kasinatian may kalabotan sa adolescent health ug development.
Gipahayag usab ang pagpasalamat sa lokal nga panggamhanan, ilabina kang Mayor Glona G. Labadlabad ug Dr. Rex V. Samson, Municipal Health Officer, tungod sa ilang padayon nga suporta sa mga inisyatibo nga nagtutok sa pagpalambo sa adolescent health services sa lungsod.
Dugang pa sa teknikal nga mga leksyon, nahimong oportunidad ang maong kalihukan aron mapalig-on ang panag-uban tali sa mga partisipante pinaagi sa mga diskusyon, interactive activities ug pagpaambit sa kasinatian.
Bisan pa og natapos na ang tulo ka adlaw nga training, gilauman nga ipadayon sa mga partisipante ang ilang mga nakat-unan pinaagi sa aktuwal nga pagserbisyo sa mga kabatan-onan ug sa pagpalambo sa mas luwas, matinahuron ug accessible nga health services.
Ang AJA 2.0 Skills Enhancement Training nagpasiugda sa kamahinungdanon sa pagpamuhunan sa kahibalo ug kapasidad sa mga health workers isip kabahin sa mas lig-on nga pag-atiman sa panglawas ug kaayohan sa sunod nga henerasyon.(MEDALYN U. BORJA)
Source: RHU Sindangan