Giluagan na ang restriksyon sa Cagayan de Oro human gipaubos sa National IATF sa Alert Level 1 ang syudad sugod kagahapong adlawa, Marso 1 hangtud Marso 15 ning tuig.
Ubos sa Alert Level 1, gitugotan na ang tanang katawhan sa syudad, walay pili sa edad, sa paggawas sa ilang panimalay o pagbiyahe, sigun pa ni Atty. Jose Edgardo ‘Egay’ Uy, ang chairman sa Economy Cluster sa Covid-19 Emergency Operations Center.
Mahimo na usab ang tanang mga establisemento, trabahante ug mga kalihukan nga mag-operate ug magtrabaho sa 100% full capacity sa Alert Level 1, dugang pa ni Atty. Uy.
Apan, giklaro ni Uy nga kinahanglan pa gihapon ang QR code ug vaccination cards kung mosulod sa mga mall ug establisemento.
Padayon usab ang pagsunod sa minimum public health standards sama sa paggamit sa face mask, physical distancing, pag-disinfect sa mga kamot ug uban pa.
(Source: CIO | Cagayan de Oro City Philippines Facebook page)