Aprobado na sa Konseho sa syudad ubos ni Bise Mayor Kikang Uy ang ordinansa nga nagtugot og lugway sa gitanyag nga amnestiya sa kagamhanan sa dakbayan ngadto sa mga nanag-iya og sakyanan nga impound sa Roads and Traffic Administration (RTA).
Sa ordinansa, dugang 180 ka adlaw ang gihatag nga lugway diin ang mga nanag-iya og sakyanan nga na impound sa RTA mahimong mobayad lang sa fixed one-time charge nga ₱ 3 mil alang sa motor vehicle accumulated liability storage fee.
Si konsehal Romeo Calizo, chairman sa komite sa roads and traffic management, mibutyag nga sa unang bahin sa pagpatuman sa amnestiya mokabat sa 36 ka mga sakyanan ang nalukat. Hinuon, kini nga gidaghanon naglangkob lang sa 2.51 porsyento sa a-impound nga mga sakyanan.
Mahinumduman nga sa milabayng tuig ang dakbayan naghatag og amnestiya agig pagpalapad sa pagtuman sa Ordinance No. 10551-2007 kon Traffic Code of Cagayan de Oro City.
Tumong sa maong lakang nga mahatagan sa kahigayonan ang mga interesadong tag-iya paglukat sa nakompiskang mga sakyanan sulod sa dugay nang panahon.
Subay sa Traffic Code sa dakbayan, gipahamtang ang tag-₱ 100 matag adlaw nga storage fee alang sa light vehicles ug ₱ 300 matag adlaw sa mga heavy equipment. Ug tungod sa kadugayon, dako gayud ang mabayaran sa mga nanag-iya sa a-impound nga mga sakyanan, pasabot ni Calizo.
Siya midugang nga kining P3 mil nga amnestiya dako na kaayong tabang sa mga nanag-iya sa sakyanan.
Nasayran nga human sa unang 180 ka adlaw nga pagpatuman sa amnestiya ubay ubay pa sa mga sakyanan ang wala malukat sulod sa dugayng panahon u gang lugway nga 180 ka adlaw gilaumang mag-engganyo sa mga nanag-iya nga lukaton ang ilang mga sakyanan samtang dili pa magpahigayon og public auction sale ang dakbayan.
(Source: CdeO City Council Facebook page)