Hayan matagamtam na sa mga sakop sa ZONACAR Homeowners Association diha sa Zone 7, Barangay Carmen ang ilang gihangyong waiver gikan sa kagamhanan sa syudad aron mapadali ang pagpa-titulo sa lote nga ilang giokupahan nga napalit sa kagamhanang lokal niadtong tuig 2002.
Atol sa tigom sa komite, gibutyag ni Konsehal Edgar Cabanlas, chairman sa komite sa Urban and Rural Poor and Housing Development, nga dugay nang gisugdan ang paghikay sa mga dokumento alayon sa maong katuyuan apan wala kini mapadayon tungod sa nahitabong paghapak sa bagyong Sendong diin apektado ang nasangpit nga dapit ug gikabalaka niini nga basin masundan pa sa laing kalamidad.
Hinuon, gibutyag sa konsehal nga matibawas na kini human ang proyekto sa megadike gilantawng makompleto na.
Nunot niini, gihangyo ni Cabanlas ang opisina sa Task Force Emancipation ni Engr. Armen Cuenca nga makigtambayayong sa kapunungan aron maatiman ang mga gikinahanglang mga papeles ug dokumento.
Niini, dako ang kalipay ug pagpasalamat sa mga residente sa daling aksyon ug rekomendasyon nga gihimo sa komite ug ni Konsehal Edgar Cabanlas.
(News & photo courtesy of CdeO City Council)