Sa walay hunong nga paghingusog sa PHO-Nutrition Division daghan nang mga programa ang naugmad nga midala og kalambuan sa tibuok lalawigan sa Misamis Oriental ubos sa liderato ni Gobernador Bambi Emano.
Sama nalang sa nahibalik nga indigay nga ginganlan og Search for the 2021 Province-wide G4 (Garden of Go, Grow and Glow) nga dunay 9 lungsod nga misumite og entries alang ning tuig nga gilangkoban sa lungsod sa Salay, Tagoloan, Claveria, Jasaan, Binuangan, Kinoguitan, Talisayan, Manticao ug Alubijid.
Ang paagi sa pagpili mao ang pagbisita mismo sa matag garden sulod sa bulan sa Oktubre pinangunahan na sa Nutrition Division ubos sa ulo niini nga si Ms. Marites Gomez uban ang G4 Evaluation Team nga mao ang mga representante gikan sa buhatan sa PAGRO ug PSWDO.
Nagmalampuson sab ang maong kalihukan tungod sa paghiusa gikan sa pwersa sa MNAOs, BHWs, BNS, ug mga LGU officials sa matag lungsod ug kabarangayan.
Dunay duha ka kategorya nga mao ang Communal ug Household sa pagpili sa mananaog niining Outstanding G4 kung asa dunay nahilakip nga mga cash prizes.
Gani sunod-sunod na nga na-evaluate ug nasuta ang mga gardens sa misalmot nga mga indibidwal ug komunidad.
Sama sa lungsod sa Claveria nga hisayrang malambuon ang pag-uma sa dapit, dili ikalimod nga mabungahon sab ang kinatibuk-ang natad sa Agrikultura.
Si Brgy. Tambubuan Kapitan Hon. Randolp S. Leuterio nagkanayon nga makanunayon na kining gaaghat sa mga tagbalay mahitungod sa importansya sa backyard gardening.
Gikalipay usab niini nga adunay mga programa sama niini si Gobernador Bambi nga kanunay naglantaw sa Misamisnon nga dili magutom kay anaa lamang makuha ang pagkaon sa ilang nataran timailhan kini sa iyang maayong panglantaw ug pagdumala sa lalawigan.
“Nalipay ko sa suporta ni Governor Bambi Emano sama nalang sa pagpanghatag niya anang organic fertilizers. Katuyoan man ni Gobernador nga matabangan ang mga tawo, usa sad ko nga ga-assist sa iya kung unsa man ang mga panginahanglanon sa mga e-implement nga programa,” matud ni Kapitan Leuterio.
Samtang alang sa usa sa mga household garden owners nga si Ms. Lorelyn Pallo nga lumulupyo sa P-3, Brgy. Tambubuan, Claveria nga dako kaayo ang kamahinungdanon sa maong indigay tungod samot napahimuslan nila ang oportunidad sa pagbaton ug garden nga sukad pa kaniadto hinguhaan na nila sa panginahanglanon sa pagkaon.
“Sa among pamilya dako kaayo ni og tabang kay bawas na sa budget sa pagkaon dili na kinahanglan magpalit sa gawas, naa na tanan diri. Gamit sad nako ang mga trainings ug seminars sa LGU nga akong na-apply dari sa garden. Gani dagdag income sab ni kanamo kay naa man gyod mamalit nga mga silingan,” sulti ni Ms. Pallo.
Laraw sa pagpahigayon sa kagamhanang probinsya niining Search for Outstanding G4 nga luyo sa gisagubang nga pandemya ning kasamtangan dili mahunong ang panginabuhian ug samot mapalawig sa tanang Misamisnon ang kapasidad sa mga buluhaton sama sa pag-garden nga ang dalang kaayo mao ang pagbatok sa isyu sa sa food insecurity nga usa ka rason sa malnutrition nga problema.
(Source: Provincial Health Office)
