Gipasidunggan sa Anti-Red Tape Authority kon ARTA ang kagamhanan sa dakbayan sa Cagayan de Oro human gipatuman sa city hall ang ‘full automation’ sa Electronic Business One-Stop Shop kon eBOSS.
Ang Certificate of Commendation gidawat mismo ni City Administrator Atty. Roy Hilario Raagas, kinsa maoy mirepresentar ni Mayor Rolando ‘Klarex’ Uy, gikan kang Secretary Ernesto V. Perez, ang Director General sa Anti-Red Tape Authority, atol sa inagurasyon sa bag-ong regional field office sa ARTA nga nahimutang diha sa NFA compound, Baloy, barangay Tablon adlaw’ng Huwebes, Hunyo 22.
Ang computer automation program sa eBOSS maoy usa sa mga inobasyon nga gibuhat sa City Finance Department aron mas paspas ug haruhay ang proseso sa paglukat og business permit sa tuyo nga dili na mahasol ang mga negosyante pagdalikyat sa city hall.
Tipik sa full automation sa eBOSS ang online billing and payment system alang sa pagbayad og business ug real property tax, traffic violation, city building fees, market stall rental, ordinance violation receipt (OVR) ug civil registry fees.
(News and photo courtesy of CIO CDO)