Mokabat na sa 548, 576 ka mga residente sa Cagayan de Oro nga nag-edad 12 anyos pataas ang nakakompleto na sa bakuna batok COVID-19 sukad gisugdan ang vaccination rollout dinhi sa syudad niadtong Marso 2021.
Samtang sa maong ihap, anaa pa sa 122,571 ka mga residente nga 18 anyos pataas ang natupokan sa COVID-19 booster shots.
Padayong gi-awhag ni Dr. Teodoro Yu Jr., medical officer sa City Health Office, ang adult population nga nakakompleto na sa primary series sa COVID-19 vaccines human duha ngadto tulo ka bulan ang milabay nga i-avail ang libreng booster shots nga gitanyag sa gobyerno aron dugang proteksyon ug pagpakakusog sa resistensya batok COVID-19.
Mapasalamaton usab ang kagamhanang lokal sa Cagayan de Oro sa hugot nga suporta sa Department of Health, pampubliko ug pribadong ospital, pribadong sector, ingon man ang kanunay’ng assistance sa United States Agency for International Development (USAID) alang sa vaccination program sa syudad.
Ugmang adlawa, Abril 13, padayong abli ang SM downtown, SM city uptown ug Tagpangi Elementary School alang sa pagpamakuna sa 5-11 anyos.
Samtang alang usab sa 12 anyos pataas, anaa ang Limketkai, SM downtown drive thru, public terminals diha sa Bulua ug Agora, Barangay Health Centers nga nahimutang sa Camaman-an, Indahag, Cugman, Agusan, Xavier Heights, Pagatpat, Carmen, Iponan, Nazareth, ug house-to-house vaccination sa Macanhan, Carmen.
(Source: Cagayan de Oro City Philippines Facebook page)