Dako ang kalipay ni Konsehal Edgar Cabanlas, chairman sa komite sa Urban and Rural Poor and Housing Development, nga gituki sa konseho ang gipadangat nga special report ni konsehal Reuben Daba sa sesyon ni-adtong Lunes nga gidumala ni Bise Mayor Kikang Uy.
Kini may kalabutan sa Administrative Order No. 26 ni Presidente Rodrigo Duterte nga nagmando paghatag ug hazard pay sa mga trabahante.
Sumala ni Cabanlas nga angayan lang hatagan sa insaktong mga benepisyo ang mga medical workers kay ana-a kanunay sa risgo ang ilang panerbisyo ilabe na ang ilang pag-atiman sa mga pasyente sa Covid-19.
Dugang sa konsehal nga angayan lang nga hatagan sa dignidad ug kasigurohan ang tanan mga health workers nga nagsakripisyo ug nahilayo sa ilang pamilya tungod sa tawag sa panginahanlan niining panahon pandemia.
Alayon niini gisugyot ni Cabanlas nga matabangan ang mga nurses ug uban pang mga health workers sa J.R Borja labina nga adunay pipila nga dugay nang nagserbisyo apan hangtod sa kasamtangan nagpabiling Job-Order ang estado sa ilang pagpanarbaho ug siya nanghinaot nga mapangita-an kini sa permanenteng posisyon alang sa kasigurohan sa ilang pagpanarbado ug pagserbisyo sa gobyerno. (Sangguniang Panglungsod)