Manamnama a maisayangkat ti inagurasyon ti “broodstock” idiay Pasuquin Fish Farm iti umuna wenno maikadua a lawas ti masungad a bulan ti Hulyo.
Inbunannag ni Provincial Agriculturist Mrs. Norma Lagmay a naggapo ti pundo iti pannakaipatungpal ti nasao a proyekto manipud iti Bayanihan 2 nga agdagup iti sangapulo ket lima a milyon a pisos.
Imbatadna a ti nasao a “fish farm” ti pagtaraknan ti probinsia iti Malaga ken bangus iti masungsungad nga aldaw.
Mainaig iti daytoy, mangnamnamna ni Gob. Matthew Marcos Manotoc a dakkel ti maitulong daytoy tapno saanen nga agkamtud pay ti produksion ti ikan ditoy Ilocos Norte.
Impatalgedna ti panangipaay ti gobierno probinsial ti agtultuloy a suporta iti nasao a proyekto.
Naammoan a naiget ti panangmonitor ti Bureau of Fisheries and Aquatic Resources iti nadakamat a pagtaraknan ti an-anak a Malaga ken bangus. (Cita Macalipis, RPN DZRL Batac Correspondent)
(Source: Provincial Government of Ilocos Norte – Communications & Media Office)
