Davao Occidental – Kasamtangan nga gi-dili una sa karon ang pagpasulod sa public transport sa Davao Occidental sugod Setyembre 20 hangtud sa Setyembre 26 ning kasamtangang tuig isip paglikay sa padayong pagsaka sa kaso sa covid-19 sa probinsya.
Ang nasangpit nga kamandoan pinasubay sa gipagawas nga Executive Order No. 23, Series of 2021 sa Provincial Government sa Davao Occidental pinirmahan ni Governor Claude P. Bautista.
Hinuon, mahimong makasulod sa Davao Occidental ang mga negosyante ug mga essential workers basta dunay bitbit ug makapakita ug ligal nga mga dokumento sa iyang katuyoan sa pagsulod sa probinsya.
Subay sa listahan sa Department of Health XI – Daily Regional Situation, natala sa miagi nga Biyernes, Septiyembre 17, dunay daghang namatay nga miabot sa ihap nga 32 gumikan sa Covid-19 didto sa Davao Occidental.
Kini maoy hinungdan ngano’ng gidili una sa karon ni Gov. Bautista ang yano lamang nga pagpasulod sa ilang probinsya sa tumong nga malikayan ang pagdaghan sa kaso sa Covid-19 ug aron usab mahatagan ug proteksyon ang mga residente sa maong probinsya.
(Source: Davao Occidental Provincial Gov’t PIO, photos courtesy by Harry Chester Firman Camoro)
