Aron ipahibalo ang pagsugod sa tinuig nga kampanya sa pagbayad sa buhis, mibisita angemga opisyales sa Bureau of Internal Revenue (BIR) Dipolog ngadto kang Gov. Darel Dexter Uy.
Gidala sa delegasyon sa BIR ang opisyal nga imbitasyon alang sa “Tax Campaign Kick-Off 2026” nga ipahigayon karong Marso 4 sa Top Plaza Hotel.
Sumala sa mga opisyal sa BIR Dipolog, ang kalihokan dili lamang ceremonial nga programa kundili usa ka lakang aron mas mapalig-on ang disiplina sa pag-file ug pagbayad sa buhis sa hustong oras. Giingong ang tukmang pagbayad sa buhis maoy dakong tabang sa pagpalambo sa mga proyekto ug serbisyo publiko sa probinsya.
Gipadayag usab nga padayon ang maayong compliance rate sa Zamboanga del Norte, nga nagpakita sa kooperasyon sa mga negosyante ug magbubuhis sa lalawigan.
Sa laing bahin, mipahayag si Gov. Uy og suporta sa kampanya sa BIR ug giila ang papel sa matag magbubuhis sa pagpadagan sa mga programa sa gobyerno. Giawhag niya ang publiko nga likayan ang ulahing pag-file sa 2025 Income Tax Return aron malikayan ang multa ug dugang nga bayranan.
Ang maong kick-off activity magsugod alas 8:30 sa buntag ug maglatid sa mga inisyatiba sa BIR ubos sa temang “Mahusay na Serbisyo Katumbas ng Buwis Mo,” nga nagtinguha sa mas episyenteng serbisyo isip balik sa kontribusyon sa katawhan.(IKEN B. GULLEM)
Source: Zamboanga del Norte Provincial News Network