Mokabat sa 600 ka runners ug fire safety advocates ang miapil sa Fire Prevention Run 2026 nga gipahigayon isip kabahin sa pagsaulog sa Fire Prevention Month niadtong Marso 1, 2026 sa D’Food Hub and Events Center, Dipolog Sunset Boulevard.
Gipangunahan sa Dipolog City Fire Station ang maong kalihokan nga may temang “Takbo Laban sa Sunog,” nga nagtumong sa pagpalig-on sa kahibalo sa komunidad bahin sa paglikay sa sunog ug kahandaan sa panahon sa emerhensiya.
Mitambong sa kalihokan si City Fire Marshal Aprilyn B. Barbaso ug Provincial Fire Marshal Richard C. Timosa, nga parehong mipahayag sa kamahinungdanon sa kooperasyon sa matag sektor sa pagmintinar sa kaluwasan sa publiko. Anaa usab si Michael “Jojo” Documento, miyembro sa Sangguniang Panlalawigan sa Ikaduhang Distrito, nga mitambong isip representante ni Darel Dexter T. Uy.
Gibahin sa tulo ka kategorya ang fun run—12 kilometro, 6 kilometro, ug 3 kilometro—nga naghatag og oportunidad sa mga propesyonal nga runners, fitness enthusiasts, ug ordinaryong lumulupyo sa pagpakita sa ilang suporta sa kampanya batok sa sunog.
Ang malampusong pagpatuman sa maong kalihokan nagpakita sa lig-on nga panaghiusa sa komunidad sa Dipolog City sa pagpalambo sa kahibalo ug responsableng paglikay sa mga insidente sa sunog, nga nagpamatuod nga ang kaluwasan usa ka hiniusang responsibilidad sa tanan.(IKEN B. GULLEM)
Source: Dipolog City Government