Iriga City – Dagos ng itinalaan kan Sangguniang Panglungsod kan Iriga an temporary minimum fare sa mga trimobile na nag-ooperar sa man lain lain na barangay., ini kasunod naman kan nagin reklamo kan mga pasaheros na mina-abot sa 100 pesos an saindang plete asin garo arkilado an sitwasyon sa lindong kan modified general community quarantine (MGCQ).
Ini an kinompirmar ni konsejal Sonny Magistrado kan Iriga, matapos na maka-olay kan Radyo Ronda.
Sigun sa konsejal, itinalaan ninda sa 20 pesos na minimum na plete sa inot na duwang kilometro mientras na kadagdagan na 10 pesos sa mga masunod na kilometro., na dakulang bawas sa presenting sitwasyon mientras na igua pa nin community quarantine huli sa covid 19 pandemic.
Sigun sa konsejal, harus 50% an nabawas sa dating singgil na plete kan mga trimobile drivers sa cuidad, kasabay kan pagsabi na tinutugutan naman sa cuidad an duwang pasahero sa lambang trimobile alagad kaipuhan na magkaigua nin barrier sa likodan na parte kan tsuper nin trimobile sa Iriga.
Inot kaini, saro sana an tinutugutan na maglunad sa lambang trimobile, alagad ngunian tugot na an pagkakaigua nin duwang lunad sa lambang biyahe kan trimobile sa cuidad kan Iriga.
(OIC Melvin Barayoga, RPN DZKI Iriga)
(Source: Interview with Sonny Magistrado)