Ti Technical Education and Skills Development Authority (TESDA) ket mangitukon kadagiti baro nga scholarship grants iti moderno a panagtalon iti pagay, a nairanta a tumulong a mangparang-ay iti matgedan dagiti mannalon.
Dinakamat ti Provincial Director ti TESDA a ni Socorro Galanto ti kasapulan a masanay dagiti mannalon kadagiti pamunganayan ti operasion ti rice machinery kalpasan a nakaawatda iti nagadu nga agri-machinery units manipud iti gobierno.
Dagiti scholarship grants ket adda iti babaen ti Program on Accelerating Farm School Establishment (PAFSE) ken Rice Extension Services Program (RESP).
Maipatpatungpal daytoy kas paset ti enterprise-based training ti TESDA tapno maitandudo ti pannakaipasdek dagiti farm schools, ken pannakausar ti “farmer to farmer, learning by doing” a metodolohia.
Iti sabali a bangir, maipatpatungpal ti Rice Extension Services Program babaen ti Republic Act 11203, wenno Rice Liberalization Act, a napirmaan idi 2019. Iti babaen ti RESP, kinuna ni Galanto nga itukonda ti short-term courses kas iti rice machinery operation, drying and milling plant servicing NC III, agro-entrepreneurship NC II, pest and nutrients management, kasta met ti digital agriculture course para kadagiti mannalon nga interesado panagaramid ti marketing content ken product demonstration babaen ti internet, social media wenno dadduma pay a media platforms.
Agtultuloy ti panangaramid ti TESDA iti ad-adu pay a training courses para iti agriculture ken post-harvest training programs tapno mapasayaat ken mapalawa ti serbisiona ken makatulong a manggun-od iti food self-sufficiency iti pagilian.
(April Joyce Gonzales, photo credits to the owner)