- Advertisement -
Kalamansig, Sultan Kudarat – Boluntaryo nga nitahan sa awtoridad ang duha ka rebeldeng sakop sa Communist Terrorist Group (CTG) nga taga Platon Uno, SRC Daguma sa Sitio Bantugon, Brgy. Ang Sta. Clara, Kalamansig, Sultan Kudarat, Enero 7, 2024.
Si Police Major Heilbronn G Okoren, Hepe sa Kalamansig Municipal Police Station, niila sa mi-surrender nga mga sakop sa CTG nga sila si “Ka Niko”, 21-anyos, ulitawo, residente sa Brgy. Limulan, Kalamansig, Sultan Kudarat; ug “Ka Aguilos”, 21, minyo ug residente sa Brgy. Poloy-Poloy, Lebak, Sultan Kudarat.
Matod ni PMaj Okoren, dungan sa pag-surrender sa duha ka mga rebelde, gi-surrender usab nila ang duha ka unit sa M16 rifle, usa ka Grenade, unom ka magazine sa M16, mga bala ug uban pang kahimanan nga nagpakita sa ilang kinasingkasing nga pagsurender sa gobyerno.
Samtang ang duruha ana na karon sa kustudiya sa Kalamansig MPS ug nakig-alayon usab sa Local Government Unit sa Kalamansig alang sa pasiunang suporta nga ilang madawat nga anaa sa Enhanced Comprehensive Local Integration Program (E-CLIP) sa gobyerno.
Katuyoan sa maong programa mao ang pagtabang sa mga kaigsoonan nga miyembro sa CPP-NPA-NDF nga gustong makabig sa gobyerno.
Pinaagi niini, mahatagan sila og lain-laing tabang, kahibalo ug kahanas nga ilang magamit sa pagbag-o sa ilang kinabuhi.
Matod niya, dili lang sila ang makabenepisyo sa maong programa kon dili lakip na ang ilang pamilya. Aron sila hingpit nga magbag-o sa ilang kinabuhi ug makab-ot ang hingpit nga kalinaw ug kauswagan sa atong nasud.(Jun Abelo)
Photo PCADG R12
- Advertisement -
