Napadayawan dagit! sumagmamano a “quarry permittee” ditoy Ilocos Norte.
Maibilang kadagiti naipaayan ti pammadayaw dagiti outstanding Commercial Sand and Gravel Permit wenno CSAG ken Industrial Sand and Gravel Permit wenno ISAG permit holder iti tawen 2021 ken 2022.
Insuno ni Provincial Administrator ken agak-akem a Provincial Quarry Officer Atty. Yvette Leynes ni Gob. Matthew Marcos Manotoc a nangipakaammo kadagiti napadayawan a permit holder.
Segun kenkuana, adda ti tallo a nabigbig a napintas ti operasyonna ken awan ti nalabsingna a pagalagadan iti panagquarry nga ISAG permit holder,
Imbatadna a dagitoy da Mr. Allain Chua Lee, proprietor ti Viking Construction Supplies, Mr. Eddie Mar Obasa a mangisaysayangkat ti panag-quarry idiay Brgy. Dampig ti ili a Pagudpud ken ni Mrs. Imelda Llanes a mangisaysayangkat ti panagquarry iti ili a Vintar.
Kabayatanna, inpakaammo ni Leynes a lima dagiti napadayawan a CSAG permit holder.
Inbunannagna a karaman ditoy da Mr. Antonino Agustin a masarakan ti “quarry site” na idiay Brgy. Manalpak ti ili a Solsona ken ni Mr. J Mc Ray Teodoro a mangisaysayangkat ti panag-quarry idiay Brgy. Lipay ti ili a Solsona.
Inlawlawag ti agak-akem a Provincial Quarry Officer a sumagmamano kadagiti nagbasaranda iti panangpilida kadagiti napadayawan a “quarry permittee” ti kinasapada nga agisubmitir iti agbinulan a report dagitoy kas maiyallubog iti section 11 ti Provincial Quarry Ordinance, panangipaayda ti maiyannatup a Corporate Social Responsbility kadagiti lugar a pangisaysayangkatanda ti panag-quarry ken baybayadanda amin a rumbeng a bayadanda basar iti nailanad a volume iti ECC dagitoy ken kadagiti ISAG permittees ket masapul nga addaan pay dagitoy ti “processing plant” a kas maiyallubog iti naisubmitir a “program of works”.
Innayonna a napili dagiti maseknan babaen kadagiti kameng ti Provincial Quarry Council a buklen da Sang. Panlalawigan Member Raphael Medina a chairman ti committee on environment iti Sang. Pantalawigan, PNP Provincial Director Julius Suriben, Provincial Treasurer Mrs. Josephine Calajate ken Provincial Environment and Natural Resources Officer Victor Dabalos. (Rodrigo Sadian)
(Source: Provincial Government of Ilocos Norte)