Agduma ti proyekto ti Laoag City ken iti gobierno probinsial a housing project babaen iti Dept. of Human Settlement and Urban Development wenno DHSUD.
Daytoy ti ilawlawag ni Gobernador Matthew Marcos Manotoc kalpasan nga adda pay ti maararamid a housing project ti Laoag iti Brgy. Talingaan a maysa a condominium.
Segun iti gobernador, sabali ti Laoag City ken iti probinsia a housing project a maaramid iti lote a kukua ti gobierno iti asideg ti Provincial Engineering Office.
Inpalgakna nga agpada a programa ngem agsabali a proyekto baben met laeng iti DHSUD ngem sabali iti project development ken dadduma pay nga entities.
Kunana nga agtultuloy met ti panangfollow up ti probinsia kalpasan a napirmaan iti Memorandum of Understanding ken katulagan iti nagbaetan ti Ilocos Norte ken ti DHSUD para iti pannakaipasdek ti housing project.
Naamuan a dagiti benepisiario ket dagiti minimum wage earners ken dagiti pamilia a maiyakar manipud kadagiti napeggad a lugar.
Ti DHSUD iti kangrunaan nga ahensia ti gobierno a responsible iti pannakaiwanwan, pannakailakad, regulasion ken koordinasion iti housing program, settlement ken pakaseknan iti urban development. (Rod Sadian)
(Source: Provincial Government of Ilocos Norte)