Umabot iti nasursuruk ngem 21 a milyon a pisos ti balor dagiti makinaria a pagtalon nga inyawat ti PhilMech iti Ilocos Norte kas paset ti pannakaipatungpal ti Rice Competitiveness Enhancement Fund (RCEF) Mechanization Program.
Maibilang ditoy ti walo (8) a four-wheel tractor, 10 a hand tractor, dua (2) a walk-behind transplanter, dua (2) a rice reaper, ken uppat (4) a rice thresher.
Mainaig iti daytoy, impadanon ni Gob. Matthew Marcos Manotoc ti panagyamanna iti Department of Agriculture (DA) ken PhilMech pakairamanan da Congressman Ferdinand Alexander Sandro Marcos ken Congressman Angelo Marcos Barba.
Inpakaammona a dagiti benepisiario ket manipud ti ili a Pagudpud, Burgos, Pasuquin ken Piddig iti umuna a Distrito idinto nga iti maikadua a Distrito ket manipud iti ili a Badoc, Paoay, Currimao, Marcos, ken Nueva Era.
Kagiddan daytoy, impadanonni Gob. Marcos Manotoc ti panangnamnamana nga adda manen ti sabali pay a makinaria nga ipaay ti PhilMech para iti probinsia iti masungad a bulan.
Inlawlawagna a kasapulan unay ti makinaria tapno umado ti produksion dagiti mannalon ditoy probinsia.
Kunana a marigatan ti probinsia a gumatang kadagiti dadakkel a makinaria rason a masapul iti pannakibinnulig iti DA ken PhilMech para iti pannakapataud dagitoy a makinaria a kasapulan dagiti mannalon.
Kabayatanna, inbunannag ni Director Joel Datur ti PhilMech a ti RA 11203 wenno ti Rice Tarrification Law ket nangrugi idi tawen 2019 ken agngudo ita a tawen 2024.
Nupay kasta, kunana a manamnama a maiyatiddog pay ti nasao a programa iti tulong dagiti agpanpanday linteg ti pagilian kas kadagiti dua a diputado ti Ilocos Norte.
Impalgakna a ti arapaapda para kadagiti mannalon ket mismon a dagiti mannalon ti aglako ti bagas.
Mainaig iti daytoy, imbatadna a dagiti gunglo dagiti mannalon nga addaan ti bodega ket mabalinda nga ikkan ti production technologies kas iti dryer ken rice mill.
Innayonna a ti panagpaaramid ti bodega ket saan a karaman kadagiti mabalin nga ipaay ti PhilMech kadagiti mannalon nupay mabalin met dagitoy a kiddawen kadagiti agpanpanday linteg wenno saan ket maamendaran ti paglintegan a manginayon iti pannakaipaay ti bodega kadagiti mannalon. (Irene Ringor via PGIN)
