Pinabileg ti Gobierno Probinsial ti Ilocos Norte (PGIN), babaen ti Office of the Provincial Agriculture (OPAG), ti panagmula ti pakwan dagiti mannalon iti Barangay Casilian, Bacarra babaen ti panangipaay iti nadumaduma a tulong agrikultural a mangpapigsa iti produksion iti probinsia.
Sakupen ti produksion ti agarup 15 nga ektaria ken pakipasetan dagiti 50 a mannalon, a nakapataud iti nasurok a Php 5 milyon a naibilang a gross income manipud iti apit.
Nangted ti Gobierno provincial iti nadumaduma nga agricultural inputs a pakairamanan ti 210 a pakete ti hybrid watermelon seeds, 63 a sako ti inorganic urea ken yara fertilizers, 40 a sako ti foliar fertilizer, ken 400 a seedling trays.
Segun kenni Engr. Ma. Teresa Bacnat, Officer-in-Charge ti OPAG, napateg ti agtultuloy a suporta ti gobierno ken naurnos a sistema ti produksion.
Kinunana nga agtultuloy ti PGIN iti panangipaay iti production assistance kas kadagiti bukel, abono, seedling trays, ken foliar fertilizers tapno masuportaran ken mapagtalinaed ti panagdur-as dagiti high-value crops a kas iti pakwan, a maysa kadagiti mula nga adda iti kangatuan a return on investment iti probinsia.
Nagyamanda met iti suporta ni Governor Cecilia Araneta-Marcos ken Vice Governor Matthew Marcos Manotoc iti panangpabassit iti gastos dagiti mannalon.
Ti production cycle manipud Marso agingga Mayo 2026 ket nangipakita iti ababa a panawen ti produksion ken napardas a panagsubli ti puhunan, a mangpaneknek a mapapintas ken makatulong a pagbiagan ti panagmula ti pakwan iti probinsia. By: Niña Tabilos