Baliw nga inrubwat ken pinabaro manen ti Gobierno Probinsial ti Ilocos Norte ken ti Gobierno iti Quezon City iti nagbinnuligan da a programa a Producers to Consumers wenno P2C Program. Daytoy ket kalpasan a personal a pinirmaan da Gob. Mathew Marcos Manotoc a nangibagi iti PGIN ken ni Mayor Joy Belmonte a nangibagi met iti Quezon City iti maysa a Memorandum of Agreement wenno MOA.
Babaen iti P2C wenno Producers to Consumers Program, nawaya manen dagiti kameng ti SME’s wenno Small and Medium Enterprises ken dagiti mannalon a personal a mapan aglako iti Quezon City Hall a sumurot iti grupo nga iwanwanwan iti SME Office ni Ms. Elma Gabriel. Karaman kadagiti manamnama a mailako manen idiay Quezon City mangrugi inton Octobre primero ket dagiti produkto ti agrikultura, processed foods, longanisa, bagnet , kornik ken dadduma pay a produkto ditoy probinsia.
Mapalagip a nangrugi pay laeng iti 2017 a makiramraman ti Ilocos Norte kadagiti P2C Bazaars idiay Quezon City, Metro Manila babaen pay laeng iti napirmaan a MOA agingga idi 2019 a panawen pay laeng ni sigud a gobernador nga iran senadora Imee Marcos.
Mamati ti gobernador a babaen iti nasao a programa ken panagkammayet ti Quezon City Hall ket dakkel ti maitulong na kadagiti SME’s gapu ta ad adu ti maganansiya malaksid pay a maitandudu dagiti produkto da. (Cita Macalipis)
(Source: Provincial Government of Ilocos Norte)