Awan ti panawen a pilpilien ti gobierno probinsial a mangipaay ti tulong kadagiti kakailian.
Umabot iti nasursuruk ngem walo gasut a kakailian nga interesado a manggundaway iti TUPAD wenno Tulong panghanapbuhay sa ating Disadvantaged/Displaced Workers ti nagpailista iti Public Employment Service Office wenno PESO ti gobierno probinsial…
Naiyuswat ti nasao a ganuat sumagmamano laeng nga aldaw kalpasan ti panagpipili.
Inlawlawag ni Mrs. Ann Marie Lizette B. Atuan, manager ti PESO ditoy probinsia a naggapo ti pundo manipud iti opisina ni Pres. Rodrigo Duterte a kiniddaw ni Bise Gobernador Cecilia Araneta Marcos.
Paset daytoy iti naiget a panangsuporta ti bise gobernador iti maysa kadagiti kangrunaan a programa ni Gob. Matthew Marcos Manotoc.
Maipalagip nga inrakurak ti gobernador a karaman ti pannakaipaay ti naruay a pagtrabahoan kadagiti kakailian a maysa kadagiti kangrunaan a programa ti gobierno probinsial.
Innayon ni Atuan a dagiti kangrunaan a benepisiario ti nasao a programa ket dagiti kakailian manipud iti umuna ken maikadua a distrito a saan pay a nabenipisiaran iti TUPAD ken iti cash for work program ti gobierno probinsial. (Rod Sadian)
(Source: Provincial Government of Ilocos Norte)