Rinugian ti City Government of Batac ti panagiwaras ti emergency go bags kadagiti nasurok a 14,000 a pagtaengan iti intero a siudad kas paset ti disaster preparedness and resilience campaign. Agdagup iti 43 a barangay ti maipaayan iti tulong, addaan iti maysa a go bag a naipaay para iti tunggal pagtaengan. Tunggal emergency go bag ket naglaon kadagiti nasken a banag a makatulong bayat dagiti emerhensia. Karaman kadagitoy ti medical kit, power bank, flashlight, raincoat, emergency blanket, glow lights, disaster preparedness manual, ken waterproof bag. Impaganetget ni Mayor Markee R. Chua a ti programa ket mangpanggep iti panangsagana dagiti umili iti Batac tapno agbalinda a nakasagana ken alerto iti oras dagiti emershia ken kalamidad. Babaen iti daytoy nga inisyatibo, agtultuloy ti Siudad ti Batac iti panangted suporta kadagiti umili tapno agbalin a nakasagana ken natalged iti aniaman a emershia ken kalamidad. By: Niña Tabilos