Maidiaya ti innem a ribu a pagtrabahoan ditoy probinsia iti maisayangkat a “yearend job fair” ti gobierno probinsial babaen iti Public Employment Service Office (PESO) intono sabado Nobiembre dose.
Segun kenni Mrs. Anne Marie Lizette B. Atuan, Manager ti PESO ti gobierno probinsial, sangaribu lima gasut dagiti bakante a lokal a trabaho ken uppat a ribu lima gasut iti gobierno.
Imbatadna nga iti agdama ket awan pay ti insubmitir dagiti “overseas companies” a maidiaya a trabaho iti ballasiw taaw,
Nupay kasta, inlawlawagna nga adda ti dua nga overseas agencies a makipaset iti nasao nga aktibidad.
Kunana a tallopulo ket lima met dagiti local employers a nangipasigurado iti pannakipartisiparda iti job fair.
Segun kenkuana, maisayangkat ti nasao nga aktibidad iti “activity area” ti Robinsons Mall Annex ti ili a San Nicolas. Mangrugi daytoy iti oras ti alas diyes ti bigat ken agpatingga iti alas singko ti malem.
Innayonna a dagiti local employers ket mangiyuswat ti “urgent hiring” kas panagsagsagana dagitoy iti “holiday season”. (Irene Ringor)
(Source: Provincial Government of Ilocos Norte)