Aw-awisen ti gobierno ti Ilocos Norte babaen ti provincial employment service office dagiti agsapsapul iti trabaho a makipaset iti Pebrero 11 a job fair kas paset ti pananglaglagip ti probinsia iti maika-dwa gasut ket lima nga anibersario ti pannakaipasdekna.
Maibasar iti “Work in Ilocos Norte” database, nasurok a 3,000 a bakante ti trabaho manipud iti dandani sangagasut a partner agencies ti magun-od.
Segun ken ni Anne Marie Lizette B. Atuan, manager ti Public Employment Service Office (PESO), iti interview idi Mierkoles a maangay ti sibubukel nga aldaw nga event manipud alas nuebe ti bigat agingga alas kwatro ti malem iti auditorium ti kapitolio probinsial, a sadiay dagiti agsapsapul iti trabaho ket maaddaan iti gundaway a makaam-ammo kadagiti employer ken makaala iti trabaho iti dayta a lugar.
Para iti pagnam-ayan dagiti agsapsapul iti trabaho, kinuna ni Atuan a mabalin a pre-register dagiti aplikante ken maammuan ti ad-adu pay maipapan kadagiti job opportunities a magun-od iti probinsia ken ballasiw-taaw.
Mabalakadan dagiti interesado nga aplikante nga agsuot iti business attire ken mangisagana iti adu a kopia ti resume wenno curriculum vitae ken 2×2 ID pictures-da.
Ti job fair ket paset ti panggep ti gobierno probinsial a mangparang-ay iti lokal a panggedan ken agtalinaed ti probinsia a kas kabassitan ti nakurapay a probinsia iti rehion.
Awisen pay ti PESO ti dadduma pay nga employers ditoy probinsia nga agparehistro iti online job portal ti gobierno Ilocos Norte tapno mangala kadagiti kasayaatan nga empleado a maitunos iti kasapulanda. (April Joyce Gonzales)
(Source: PESO)