Naballigi ti Munisipalidad ti Badoc iti PGIN Sundown Coastal Run a nangtipon kadagiti runners ken fitness enthusiasts manipud iti nadumaduma a munisipyo iti intero a probinsia.
Nagtitinnulong nga inorganisar ti Munisipalidad ti Badoc nga idauluan ni Mayor Virgilio Calajate ken ti Gobierno Probinsial ti Ilocos Norte nga idauluan ni Gobernador Cecilia Araneta Marcos, kada Provincial Board Member Giancarlo Angelo S. Crisostomo ken Provincial Tourism Officer Aian Raquel.
Sibabara nga inabrasa ni Mayor Calajate dagiti amin a nakipaset ken inyebkasna ti panagyamanna kadagiti runners a nagbiahe manipud iti nadumaduma a ili tapno makipaset iti nasao nga aktibidad, nga impaganetget na ti kinapateg ti pannakaitandudo ti salun-at, turismo, ken pannakipaset ti komunidad babaen kadagiti aktibidad iti isports.
Ti fun run ket nangitampok iti tallo a kategoria: 5-kilometer, 10-kilometer, ken 21-kilometer runs. Limmabas dagiti nakipaset iti sumagmamano kadagiti nalatak a destinasion dagiti turista ti Badoc, agraman ti Pagsanahan Beach, ti Minor Basilica ni Saint John the Baptist, ken La Virgen Milagrosa Cove, a nangted kadagiti tumataray iti makaay-ayo a kapadasan iti igid ti baybay iti intero a lumba.
Dagiti umuna a 100 a nagturpos iti tunggal kategoria ket nakaawat kadagiti commemorative medals ken event shirts, bayat a dagiti top three finishers ket naikkan iti espesial a premio.
Ipaay ti Munisipio ti Badoc ti panagyamanna kadagiti amin nga organizers, partner agencies, volunteers, sponsors, ken participants a nakatulong iti panagballigi ti aktibidad. By: Niña Tabilos