Bigbigbigen dagiti kakailian ti Ilocos Norte ti kinapakumbaba dagiti kameng ti pamilia Marcos.
Napasingkedan daytoy a kababalin dagiti Marcoses iti panangibunannag ni Cong. elect Ferdinand Alexander “Sandro” Marcos a saanna a kalkalikaguman a maipaayan ti idauloanna a komite iti kamara de representantes.
Maipalagip a maysa kadagiti raraemen dagiti kakailian ken ni Gob. Matthew Marcos Manotoc ket ti kanayonna a panangbigbig a dagiti napipintas a nagapoanan ti probinsia ket gapu iti napintas a panagkakammayet da nga opisial, dagiti otoridad ken dagiti umili a maysa kadagiti mangipamatmat iti kinapakumbabana.
Impetteng ni Marcos a baro pay laeng iti takemna ket adu dagiti kualipikado ken natenneben kadagiti trabaho iti kamara de representantes ket rumbeng a dagitoy ti pakaipaimaan ti “chairmanship” iti nadumaduma a komite.
Imbatadna a kas agdadamo nga agpanpanday linteg ket inannugotna nga adu pay dagiti nasken a masursurona.
Inlawlawagna a nupay nagserbi ken ni Majority Floor Leader Martin Romualdez ket sabali laeng ti agbalin a trabahona kas maysa a diputado.
Kabayatanna, impalgakna a kas sumaruno a presidente ti pagilian ti amana ani Pres. elect Ferdinand Bongbong Marcos Jr. ket naituding nga agnaed idiay malakanyang ngem iti kabibianganna ket kaykayatna ti agbiag iti bukod na a wagas.
Malaksid iti daytoy, nakunana a nupay ti trabahona ket idiay Batasan Pambansa ket kalikagumna ti agsubli-subli ditoy probinsia.
Innayonna a dagiti tarigagayna a maitandudu a gakat ket adda ti pakainaigan ti agrikultura, pannakapataud ti pagtrabahoan’ ken pannakaipadur-as ti teknolohia. (Rod Sadian)
(Source: Provincial Government of Ilocos Norte)
