Ikagkagumaan ni Sang. Panlalawigan member ken Chairman iti Committee on Agriculture Hon. Domingo Ambrocio a matulungan dagiti mannalon nangruna ita a panawen ti panagga-apit iti pannakailako dagiti produkto da nga irik iti maikanatad a presyo.
Segun kenkuana, addan dagiti ar aramiden nga addang ti gobierno probinsial babaen ken ni Gob. Mathew Marcos Manotoc a pangtulong kadagiti mannalon kasta met iti National Food Authority.
Kunana a no nabilagen a nasayaat dagti nagapas nga irik dagiti mannalon, agar ari iti 19 a pisos ti kada kilo iti paggatang ti NFA.
Kunana nga ibaklay met ti probinsia iti pannakaala dagiti irik a gatangen ti NFA a maipan iti bodegada a pakaipunduan na pay laeng.
Kunana nga adda iti bodega ti NFA iti Dingras no dagiti magatang nga irik ket aggapu iti dumaya a paset ti probinsia kas iti Dingras, Solsona ken Nueva Era.
Inlawlawagna nga iti maikadua a distrito, adda met ti warehouse ti NFA iti ciudad ti Laoag. Inbatad na a daytoy ket kas tulong metten ti probinsia iti NFA nga immunan a nagkiddaw ti tulong iti pannakaala dagiti gatangen da nga irik.
Inlawlawagna nga maiyur uray pay iti panangaprobar ni Gob. Marcos Manotoc iti dati a programa a “buy back operation” ti gobierno probinsial tapno maipaayan iti naan anay nga importansia dagiti mannalon.
Immun una ngem iti daytoy, aganil il dagiti mannalon gapu ti kinalaka iti presyo ti irik a paggatang dagiti middle man a 13 agingga iti 14 pesos ti kada kilo.
Innayonna a no adda met iti organisasion dagiti mannalon a mayat a mangilako kadagiti apit da nga irik iti NFA iti bulto bulto, mabalin da latta nga ipakaammo iti National Food Authority tapno maminpinsan iti pannakabunag da a maipan met laeng iti warehouse ti NFA.