Nagpirma iti “pledge of commitment” da Gob. Matthew Marcos Manotoc ken dagiti pannakabagi ti Cooperative Development Authority (CDA) ti rehion uno.
Daytoy ket kalpasan ti panangipaay ni Gob. Marcos Manotoc ti “solidarity message” iti naisayangkat a “Region One Cooperative Stakeholders Summit 2023” iti Ilocos Norte Centennial Arena nga inatendaran ti umab-abot iti 700 a kameng dagiti nadumaduma a kooperatiba ti rehion.
Naammoan a kaaddoan kadagiti nagatendar ket dagiti kameng ti nadumaduma a kooperatiba manipud iti probinsia ti Pangasinan.
Mainaig iti daytoy, ibilang ti gobernador a naimballigian ti nasao nga aktibidad a naisayangkat ditoy probinsia nga addaan ti tema, kooperatiba, mangidaulo iti panagrekobre iti baet dagiti moderno a karit a gubuay ti “climate change” ken “food security”.
Mangnamnama ni Gob. Marcos Manotoc nga ad-adda pay a mapatibker ti panagtimpuyog ti Provincial Government Ilocos Norte nga idadauloanna ken ti CDA kadagiti sumarsaruno nga aldaw.
Ginutigotna dagiti kameng ti kooperatiba a mangitultuloy a mangipatungpal kadagiti napagsasaritaan kabayatan ti nasao a taripnong ken ania man a maaramid a panagbalbaliw wenno panagdur-as ket nasken nga ad-adda pay a mapasayaat.
Kagiddan daytoy, binigbig ni Gob. Marcos Manotoc ti dakkel a maitultulong ti kooperatiba kadagiti mannalon ken kadagiti kakailian.
Ginutigotna ti CDA a mangisigurado a dagiti kooperatiba ket agtrabtrabaho para kadagiti kakailian ken mangipatalged a masaluadan dagiti kameng ti kooperatiba.
Innayon ti gobernador nga agingga a napintas ti panagkakammayet dagitoy nga agtrabaho ket agtultuloy ti suportana kadakuada. (Irene Ringor)
(Source: Provincial Government of Ilocos Norte – Communications & Media Office)