Gutgutiguten ni Gobernador Mathew Marcos Manotoc dagiti kailian nga agkiddaw ken ipadanon laeng dagiti kalikagum babaen iti “Agri ka dito hotline” ti probinsia tapno maited ken masupurtaran dagiti kasapulan iti panagtalon.
Segun iti gobernador, sindadaan ti probinsia a tumulong ken mangipaay iti kasapulan nangruna no dagitoy ket naapektaran dagiti mula iti napalabas a bagyo Neneng.
Segun iti gobernador, dandani 200 a milyon a pisos ti balor dagiti nadadael a mula dagiti mannalon iti pagtatalonan gubbuay ti nasao a bagyo.
Impasigurado ti gobernador nga idanon ken agkiddaw laeng iti “Agri ka Dito program” ti probinsia gapu ta nairanta daytoy a pakaiturungan dagiti kalikagum ken arungaing a kayat nga ipadanon a masulusyunan.
Maipalagip nga itay laeng nabiit, indaulwan manen ti gobernador ti panagibunong kadagiti agricultural inputs, equipment, ken machineries kadagiti benepiciaries iti Ilocos Norte Agriculture and Fisheries Extension Center in Laoag City. (Cita Macalipis)
(Source: Provincial Government of Ilocos Norte)