Nangisayangkat ti Gobierno Munisipal ti Badoc ti FY 2027 Annual Budget Hearing idi Agosto 5 agingga 7, 2026, idiay Aloha Hotel, Manila. Iti aktibidad, impresentar dagiti municipal offices ken departments dagiti programa, aktibidad, ken kasapulan a budgetda para iti sumaruno a tawen. Naaddaan met iti diskusion a panggep iti pananglawlawag ken panangurnos kadagiti us-usaren a pondo. Nakipaset iti budget hearing da Mayor Virgilio M. Calajate, Vice Mayor Glennd George G. Cajigal, dagiti municipal officials ken department heads, agraman ni Ms. Josephine P. Calajate kas Financial Adviser. Ti Local Finance Council, nga indauluan ni Dr. Felibert Salvador, agraman ni Municipal Accountant Ms. Sherryl P. Pascual, ket nangipasdek iti panangrepaso ken panangurnos kadagiti budget proposal dagiti nadumaduma nga opisina. Naipaay ti prioridad kadagiti programa ken serbisyo a direkta a makatulong kadagiti umili, kas iti edukasion, salun-at, social welfare, agrikultura, disaster preparedness, imprastraktura, turismo, ken pannakasayangkat ti ekonomia. Nakalpas ti tallo nga aldaw a budget hearing a nasayaat ti resulta. Nakatulong daytoy iti panagkaykaysa ken panagtitinulong dagiti opisial ken empleyado ti munisipio. Babaen iti daytoy a proseso, ti LGU Badoc ket agtultuloy iti responsable ken nalawag a panagbudget, tapno maun-od dagiti pondo ket mausar iti programa ken serbisyo a kasapulan dagiti umili. By: Niña Tabilos