Napili ni Gob. Matthew J. Marcos Manotoc a kangrunaan a sangaili ken agsarita iti panangrugi ti agtallo nga aldaw a pannakaisayangkat ti DOST Stakeholders Forum and Caravan Bringing Science and Technology closer to the people “Lakbay Teknolohiya para kay Juan at Juana” Northern Luzon Cluster.
Nupay kasta, saan a nakaatendar ti gobernador ken insuno ni Atty. Pancho Jose, Chief of Staff ti gobernador.
Mainaig iti daytoy, inbunannag ti abogado a dakkel a pakaidayawanna ti panagatendar ken panangisunona iti gobernador iti nasao nga aktibidad.
Kagiddan daytoy, impadanonna ti panagyamanna iti DOST iti panangiyuswatda iti nasao nga aktibidad iti Ilocos Norte kangrunaanna iti Teatro Ilocandia ti Mariano Marcos State University wenno MMSU.
Impatalgedna ti agtultuloy a suporta ti gobierno probinsial kadagiti nadumaduma a ganuat ti ahensia a pangtulong kadagiti MSME’s ken dagiti nadumaduma nga industria ditoy probinsia.
Imbatad ni Jose a bigbigbigen ti gobierno probinsial ti panagkasapulan a mangpadur-as iti kabaelanda babaen iti pannakaiyadal kadakuada kadagiti maiyannatup a teknolohia.
Inlawlawagna a kadagupan dagiti negosio ditoy probinsia, siyam a pulo ket siyam punto innem a porsiento dagiti MSME’s ket dakkel a banag dagiti ganuat nga ar-aramiden ti DOST a pangtulong kadakuada.
Innayonna a babaen kadagitoy a ganuat ket masigurado ti panagdur-as dagiti inrubuat dagitoy a negosio a mangisigurado iti saan a panagbisin dagiti kakailian iti Ilocos Norte. (Cita Macalipis)
(Source: Provincial Government of Ilocos Norte – Communications & Media Office)
