Naruay manen nga agricultural inputs ken ramit iti panagtalon ti naibunong kadagiti agmulmula ti nateng ken nadumadumana high value crops ditoy probinsia.
Inbagian ni Provincial Administrator Atty Yvette Leynes ni Gob. Mathew Marcos Manotoc iti naisayangkat a distribusion iti INAFEC building, ciudad ti Laoag.
Inpadanon ni Atty Yvette ti mensahe ni gob. marcos manotoc nga agtultuloy iti panangipaay ti probinsia iti naan anay a tulong ken supurtana iti sector ti agrikultura ditoy ilocos norte.
Kunana a saan laeng a ti grupo dagiti mannalon ti maipangpangruna no di ket uray pay iti gunglo dagiti mangngalap.
Inlawlawagna nga ipaay ti probinsia dagiti kangrunaan a kasapulan dagiti mannalon ken mangngalap nupay saan amin ket maited.
Maibilang kadagiti naibunong ket nagduduma nga agricultural inputs a kasapulan iti panagtalon ken panagpataud kadagiti nadumaduma ti klase na a natnateng kas iti abono, pesticodio, back pack sprayer, pagpatubuan kadagiti bin i a bukbukel iti nateng ken dadduma pay.
Inbatadna a napateg unay iti panagpataud ti natnateng gapu ta adu ti maipaay na iti inaldaw aldaw a panagbiag.
Kunana a saan laeng a para lako ngem ketdi nayon nga agserbi iti pamilya ken makatulong pay iti kumunidad. (Cita Macalipis)
(Source: Provincial Government of Ilocos Norte)
