Batac: Adal ken sirmata mentoring program, maisentro iti panangpartuat iti agri-base emergency food reserves

0
0

Daytoy ti inlawlawag ni Mrs. Elma Gabriel, mangidadaulo ti Micro Small and Medium Enterprises Office (MSMEO) ti PGIN. Kunana nga agawatda iti “proposal” dagiti interesado a makipartisipar iti nasao a programa agingga intono Disiembre siete.

Impalgakna a ti “emergency food reserves” a nasken a maaramid ket manipud kadagiti bukod a produkto ti probinsia a prutas ken nagduduma ti klase na a nateng.

Imbatadna a paset daytoy iti napinget a kalikagum ni Gobernador Matthew J. Marcos Manotoc a saan a pannakasayang dagiti produkto iti probinsia.

Malaksid iti daytoy, kuna ni Gabriel a mamati ti gobernador a babaen iti pannakaaramid dagitoy nga emergency food reserves ket masigurado pay ti saan a panagkamtud ti nasustansia a taraon nangnangruna iti panawen ti kalamidad wenno didigra.

Segun pay kenkuana, dagiti mapartuat a produkto ket mabalin pay a mairaman iti “feeding program” ti gobierno probinsial.

Inbunannag ni Gabriel a silulukat ti nasao a kompetision kadagiti amin nga interesado pakairamanan dagiti nangabak iti Adal ken Sirmata Mentoring Program itay napalabas a tawen.

Kunana a napintas daytoy a pakipartisiparan dagiti adda ti mapanpanunotna a napintas a produkto nga awan ti sindadaan nga usarenna a pundo gapu ta adda ti maipaay kadagitoy nga start-up capital.

Innayonna a saan nga agpatingga iti daytoy ti suporta ti gobierno probinsial agsipud ta no mapagbalin ti maseknan ti produktona ket tumulong ti gobierno probinsial kangrunaanna ti opisinada para iti pannakailako ti nasao a produkto.

Author: Irene Ringor

Source: PGIN

LEAVE A REPLY

Please enter your comment!
Please enter your name here