Umabot iti siyam a pulo ket tallo punto pito a milyon a pisos ti naipresentar a 5% Local Disaster Risk Reduction Fund ti gobierno probinsial bayat ti naisayangkat a 3rd Quarter Provincial Disaster Risk Reduction and Management/Resiliency Council Meeting.
Inlawlawag ni Mr. Marcell Tabije, Local Disaster Risk Reduction Management Officer ti gobierno probinsial a pitopulo a porsiento (70%) ti nasao a pundo ti naituding a para iti preparedness wenno panasagana, prevention and mitigation wenno pananglapped ken panangalay-ay, rehabilitation and early recovery wenno rehabilitasion ken panagrekobre.
Impalgakna a ti nabatbati a tallopulo a porsiento wenno (30 %) a maawagan ti “quick response fund” a mailatang no maideklarar ti state of calamity.
Segun kenni Tabije, adu dagiti programa ken proyekto nga indasar dagiti nadumaduma a pangopisinaan kas ti Provincial Health Office, Provincial Agriculture Office, Sustainable Development Office, Veterinary Office, Provincial Environment Office ken ti Provincial Social Welfare and Development Office.
Imbatadna a dagiti inlungalong dagiti nadakamat a pangopisinaan a mapundoan ket inaprobaran ni Gob. Matthew J. Marcos Manotoc.
Kunana nga agtultuloy ti panangipadur-as ti probinsia kadagiti kagamitanda gapu ta dumaan met dagiti dadduma.
Innayonna a nasken a gumatang dagitoy kadagiti baro a ramramit tapno iti kanito nga adda dagiti pakasapulan ket nakamkampanteda nga agusar
Author: Irene Ringor
Source: PGIN