Agarup 665 a ribu a pisos ti napastrek dagiti 50 a nakipartisipar iti umuna nga anibersaryo ti Mercato ni Nanay Ces a programa ni bise gobernador Cecil Araneta Marcos.
Ti nasao a selebrasion ket naisayangkat iti heritage historical tower, Barangay Torre iti ili a Currimao itay napan nga Oktobre 15 ken 16.
Lima pulo a Micro Small and Medium Entrepreneurs (MSMEs) ditoy probinsia ti naikkan iti gundaway a nangitandudo ken naglako kadagiti bukod da a partuat ken produkto.
Nagduduma a produkto ti naidasar ken nailako iti nasao nga aktibidad nga inarak dagiti umili saan laeng a taga Ilocos Norte ngem ketdi adda pay dagiti balikbayan a nairana a nagbakasion ken kaparanget a probinsiya.
Maibilang kadagiti inlaklako dagitoy ket nagduduma a produkto, makmakan a souvenir items, bags ken dadduma pay a maipagtangsit a produkto ni ilokano.
Inatendaran ken inpaay met ti naan anay a suporta da Gob. Mathew Marcos Manotoc, diputado Angelo Marcos Barba iti maikadua distrito, Sang. Panlalawigan Members Hon. Medeldorf Gaoat ken Hon. Portia Salenda pakairamanan ni Municipal Mayor Edward Quilala ken Vice Mayor Sandra Cabreros iti naisayangkat a programa.
Indanon met ti bise gobernador ti naimpapusuan a panagyamanna kadagiti amin a nakipagpaset kangrunaanna kadagiti 50 a local entrepreneurs iti naimbaligian a dua nga aldaw nga aktibidad iti probinsia.
Dinakamatna pay a nagyamanan iti napintas a pannakikammayet ti SME Office iti gobierno probinsial nga idadaulwan ni Ms. Elnma Gabriel, gobierno municipal ti Currimao ken dagiti opisiales ti barangay.
Masirsirmata iti maikadua nga ina ti probinsia nga agtultululoy iti napintas nga annayas ti inrubwatna a programa a Mercato ni Nanay Ces a makatulong iti pannakaitag ay ti kasasaad iti panagbiag dagiti kailian kadagiti sumarsaruno a pannakaiyuswatna.
(Source: Provincial Government of Ilocos Norte)