Nagpahigayon ug tulo ka adlaw nga Basic Rescue Orientation/Training ang mga personahe sa Bureau of Fire Protection-Special Rescue Force sa BFP-Dapitan nga gidumala sa Provincial Special Rescue Force.
Kini gisalmutan sa 40 ka mga personahe sa maong buhatan apil na ang mga OJT nga gipanguluhan ni SFO2 Roland Ladera.
Matud pa ni SFO2 Ladera, kini gipahigayon aron mabansay-bansay og maayo ang mga personahe sa BFP-Dapitan panahon nga adunay mga katalagman o emerhensiya diin mamahimo na sila mohatag sa pasiuna nga tabang sa mga nabiktima.
Human niini nga pagbansay-bansay makabaton na sa kahibalo ang mga personahe sa BFP-Dapitan ug andam na sila moresponde ilabina sa tactical rescue operation samtang mahimo usab kini nila nga ipa-ambit sa nagkalain-laing buhatan sa BFP sulod sa lalawigan sa Zamboanga del Norte.
Mapasalamaton si SFO3 Arnold Menorias ngadto ni Mayor Rosalina “Nene” Jalosjos sa suporta nga gihatag sa mao nga programa.
Usa sa mga trainees sa maong programa ang mapasalamaton mao si FO3 Mercy Rollon diin matud pa tungod niini mapalagsik ang ilang mga kahibalo sanglit dako kini’g tabang ilabina sa mga Dapitanon.
(News and photo courtesy of CITY INFORMATION DIVISION-CID-Dapitan Facebook page | BFP-Dapitan)