- Advertisement -
General Santos City – Ang 20th Sangguniang Panlungsod, (SP) atol sa ilang ika-60 nga regular session kagahapong adlawa, Lunes, Desyembre 4, 2023 nag-aprobar sa kontrobersyal nga Supplemental Budget No. 5.
Si SP committee on finance chairperson Jose Edmar Yumang miingon nga ang mga alokasyon sa budget gikuha gikan sa nagpadayon ug kasamtangang budget alang sa Calendar Year 2023 aron pondohan ang nagkalain-laing prayoridad nga mga programa ug proyekto sa LGU-Gensan
Apil na niini ang budget alang sa medical assistance sa dakbayan ubos sa AMPING; ang programa alang sa pagtabang sa mga kabus nga pasyente; tabang alang sa centenarian ug solo nga mga ginikanan; alokasyon alang sa mga grocery packs alang sa mga empleyado sa city hall; educational assistance ubos sa AKLAT ug ang sweldo sa mga job order workers nga gi-hire ubos sa Office of the Vice Mayor ug sa Sanggunian Panlungsod.
Butyag ni Konsehal Yumang, ang dugang budget nga gigahin sa AMPING PROGRAM mikabat sa P50 milyones ug ang gidugang sab nga budget alang sa EDUKAR program mikabat sa P23, 694,846.06, samtang ang pa-sweldo sa JO workers sa SP-Gensan gigahinan og P6.9 milyon, diin pa-igo na kaayo kini alang sa ilang pa-sweldo sulod sa pipila ka buwan.
Dugang asoy pa ni Yumang na nahimong hapsay ang dagan sa sesyon ug pag-aproba sa bag-ong giduso nga Supplemental Budget No. 5 tungod sa nahitabong panaghusay sa 2 ka kampo sa Ehekutibo ug Lehislatibo, alang-alang sa espirito sa nagsingabot nga pasko. (Rey Ombana)
- Advertisement -
