Cebu City – Gipahibawo sa DOTr o Department o Transportation nga ang bag-ong terminal ug runway extension sa tugpahanan sa Bantayan posibleng mahuman sa dili pa matapos ang 2020.
Tungod niini, mahimong sayon na lang unya ang pagbiyahe paingon sa maong isla nga gisakpan sa tulo ka lungsod – ang Bantayan, Sta. Fe ug Madredijos.
Sa usa ka statement, ang DOTr miingon nga nagpadayon pa ang trabaho sa runway extension ug pagpakoral sa community airport.
Midugang ang DOTr nga sa kataposan ning tuiga, makompleto na ang proyekto sa terminal ug magamit na ang 1.2 ka kilometrong runway sa Disyembre.
Basi sa gisulti sa general manager sa MCIAA o Mactan Cebu International Airport Authority, Atty. Steve Dicdican, ang DOTr miingon nga target nila nga ipahigayon ang inauguration sa proyekto sa Disyembre.
Nasayran nga giduaw ni Dicdican ang isla niadtong Biyernes aron pagsusi sa nagpadayong proyekto.
Ang Bantayan Island Airport, nga nahimutang sa 29 ka ektaryang luna sa Sta. Fe nga gipanag-iya sa probinsiya gi-classify na isip community airport.
Mahimo kining matugpahan sa mga chartered flights ug sa 12-seater plane sa Air Juan Airlines nga molupad sa isla makatulo sa usa ka semana.
Ang nagpadayong pagpalambo sa tugpahanan gihimo subay sa tinguha sa paghimo niining commercial airport. I via Jhon Tadlip/JTY
(Source: Department of Transportation( DOTr))