Malampusong napahigayon ang 1ST Quarter Media Forum 2025 kagahapong adlawa, Abril 15, 2025 sa Mibang Hotel, Barangay Sta. Filomena ning dakbayan sa Dipolog, diin kini gitambungan sa nagkadaiyang mga Media Outlets ug Propesyonals ning Probinsiya sa Zamboanga Del Norte.
Ang nasangpit nga 1st Quarter Media Forum gitambungan nila ni Provicial Health Officer II Dr. Eduardo M. Luayon, National Immunization Program Coordinator Clarinda R. Vidallo, Disease Surveillance Officer Provincial DOH Office Jonathan Karlo C. Rhudy, Sanitation Inspector I Filariasis/Schistomiasis/Wash/STH Catherine B. Barbaso, Sanitary Inspector I Ralph M. Rulog. Gibutyag ni sanitary inspector I Ralph M. Rulog atol sa naasoy nga aktibidad, nga sa tibuok Zamboanga Peninsula, ang Zamboanga Del Norte ang nag-una sa mga probinsiya sa kaso sa Dengue.
Tungod niining maong sitwasyon, iyang gi sugyot nga mas ipatuman gyud sa mga katwahan ning probinsiya ang 5S nga pamaagi, aron mapakgang ang pagtaas sa kaso sa dengue ning maong lalawigan. Gibutyag usab ni Provicial Health Officer II Dr. Eduardo M. Luayon, nga hangtod ning higayona, nagpabilin nga walay available nga vaccine alang sa mga pasyente nga biktma sa pinaakan sa halas o anti-venom vaccine, tungod matud pa, naghulat pa ang Provincial Health Office sa tubag sa sulat nga ilang gi-address sa RITM nga atua nahimotang sa Alabang Metro Manila.(Angelica T. Obina)
SOURCE: ZAMBOANGA DEL NORTE PROVINCIAL INFORMATION CENTER (PIC)-Julius Esmade