Usa ka art exhibit ang gitakda nga buksan didto sa Museo Dipolog sugod karong Pebrero 1, 2023 isip pagpahaom sa kasaulogan sa Dipolog City Love, Arts, Music Festival ug National Arts Month sulod sa tibuok bulan sa Pebrero, karong tuiga.
Gi-ulohan og “heARTlab”, ang exhibit ang mopasundayag sa lain-laing mga mugna sama sa paintings, sculptures ug arts and crafts.
Nasayran nga adunay 25 ka mga pintor ug iskultor ang mosalmot sa kalihokan lakip usab ang pipila ka mga tinun-an gikan sa Zamboanga Del Norte National High School ubos sa Special Program in the Arts (SPA) curriculum.
Ang nasangpit nga kalihokan ang gipaluyohan sa City Government of Dipolog sa pagpangulo ni Mayor Darel Dexter T. Uy. Tumong niini nga mahatagan og maayong higayon ug oportunidad ang mga Dipolognon nga adunay talento ug katakus sa natad sa arts nga mapakita ang ilang mga obra ngadto sa publiko.
Ang exhibit bukas sa publiko sa mga adlaw ug oras nga ting opisina sugod Pebrero 1 hangtud 28 ning tuiga, lakip usab sa ipahigayon atol niini mao ang art workshop nga pagahimoon sa matag adlaw’ng Biernes, sulod sa tibuok bulan sa Pebrero, ning kasamtangang tuig.
(Source: Dipolog City Government Facebook page)