Pinababawi ni Laguna 1st District Congressman Dan Fernandez sa Department of Health (DOH) ang ini-anunsyong iwasan ang pagsasagawa ng misting at spraying ng disinfectant dahil hindi umano ito nakatutulong sa paglaban sa coronavirus disease 2019 (COVID-19) bagkus ay nakasasama pa sa kalusugan.
Sa pamamagitan ng Facebook post, ipinarating ni Fernandez ang kaniyang panawagan sa DOH na linawin ang nasabing anunsyo.
Ayon kay Fernandez, unti-unting nakakaisip ang publiko ng mga paraan para makaiwas sa banta ng COVID-19 at isa nga rito ang disinfectant misting.
Giit ni Fernandez, sa halip na mag-anunsyo ang DOH ng mga ganitong klaseng paalala, dapat ang maging laman aniya ng kanilang mga pahayag ay mga aksyon o pamamaraan para malabanan ang pagkalat ng virus.