Adunay 104 ka learning hub managers ang gibansay-bansay na karon alang sa “Program Norte” sa Department of Education Zamboanga del Norte kaniadtong Pebrero 2, niining tuiga, sulod sa Atrium, Top Plaza Hotel ning dakbayan sa Dipolog.
Si Assistant Schools Division Superintendent Judith Romaguera nagkanayon nga ang maong learning hub managers alang kini sa 52 school districts sa DepEd Zamboanga del Norte nga magdumala sa E-learning hub sa maong ahensiya diin ang mga magtutudlo ug mga ginikanan dinhi mokuha sa learning materials ning new normal nga matang sa edukasyon gumikan sa giatubang karon nga pandemya sa tibuok kalibutan nga mao ang COVID-19.
Niini, si Ms. Romaguera nagpasalamat sa mga ginikanan sa ilang kooperasyon, suporta ug sakripisyo nga gihatag sa ilang mga anak aron makab-ot ang maayong edukasyon taliwala sa giatubang nga pandemya.
Nanghinaut lamang ang maong Assistant Schools Division Superintendent nga magpadayon ang ilang pagsuporta sa ilang mga anak alang sa ilang kaugmaon.
Samtang nagpasalamat usab si Ms. Romaguera sa mga magtutudlo sa ilang walay puas nga pagpaningkamot nga maatimanan ang mga magtutungha ilabi na nga ang uban dili gilayon makapasa sa modules sa gisitar nga adlaw.
Nanghinaut usab siya nga padayong motrabaho isip usa ka team sa DepEd sa susamang katuyoan nga mao ang #GalingNorte nga gikonsepto ni Schools Division Superintendent Dr. Ma. Liza Tabilon diin nagpasabot nga maayo ang DepEd Zamboanga del Norte.
Samtang si Governor Roberto Uy sa iyang mensahe nga gipaabot ni Executive Assistant Angelo Sunglao, kinsa nagrepresentar sa gobernador ang nagkanayon nga taliwala sa hulga sa pandemya nga giatubang karon, siya nanghinaut nga magpadayon ang mga magtutudlo sa pagproteher sa kabataan pinaagi sa mga programa aron ma-improbar ang ilang edukasyon samtang padayon sila nga anaa sa luwas ang kahimtang.
Gipasalig ni Governor Uy nga ang probinsya sa Zamboanga del Norte padayong kauban sa pagpatuman sa mga programa sa DepEd alang sa kaayuhan sa kaayuhan sa mga magtutungha ug magtutudlo.
Kahibaloan nga ang probinsya sa Zamboanga del Norte sa pagpangulo ni Governor Uy maoy mihatag sa 600 units sa computer nga nagkantidad sa 12 milyones ka pesos alang sa learning hub ug mao usay miabaga sa suhulan sa learning hub managers kinsa mga school board teachers sa tag P7,000 matag usa matag bulan. (PIC-mbmontederamos)