Tanan nga mga empleyado sa city ug provincial governments apil na sa mga bisita ang mopresentar sa ilang kaugalingon sa thermal screening procedures sa dili pa sila makasulod sa city hall ug capitol. Kagahapon ang tanang empleyado nagpila alang sa ilang turno sa pagpahiling kon aduna ba silay hilanat gamit sa thermal guns nga maoy mosuta sa body temperatures. Kadtong masapon nga adunay hilanat ang giawhag nga mosuot sa masks.
Sa pikas bahin kon masayran nga ang usa ka tawo adunay kasaysayan sa iyang pagbiyahe gikan sa ubang nasud nga adunay travel restrictions ug nabal-an nga adunay physical contact sa usa ka pasyente sa COVID 19, ang maong tawo ipailawom sa pagpatambal o self-quarantine.
Kini nga lakang sa city hall ug kapitolyo gihimo tapos ang health department mikonpirmar sa mga pasyente nga positibo sa coronavirus disease sa atong nasud nga padayong nagkasaka ang gidaghanon.
Si Presidente Duterte mipagula sa Proclamation 922, nga nagdeklarar sa state of public emergency human ang health department mitaho sa unang naila nga local transmission sa maong virus.
Matud pa ni City Administrator Ted Sabugaa nga ang tanang empleyado sa City Hall nga mokapin sa upat ka libo nga gadaghanon apil niadtong opisina sa syudad nga naa gawas sa City Hall ang mopailawom sa screening sa hilanat.
Ang hilanat usa sa mga common signs gawas sap ag-ubo, paghatsing, shortness of breath ug lisod ang pag ginhawa sa mga tawong na-infected sa novel coronavirus.
Samtang ang Misamis Oriental Provincial Government spokesperson Carlo Dugaduga nagsugilon nga tanan nilang 3,675 nga empleyado apil ang elective and appointive officials, regular, casual ug job-order workers ang gimanduan sa pagpresent sa ilang kaugalingon alang sa thermal gun screening sa dili pa mosulod sa kapitolyo nga building.