Ang committee on trade and commerce sa syudad sa Cagayan de Oro molusad sa usa ka imbestigasyon labot na sa alegasyon nga taas kaayo ang presyo sa mga tambal nga gipamaligya sa mga pharmasiya sudsa mga tambalanan ning dakbayan sa Cagayan de Oro. Matud pa ni committee chairman George Goking, gusto nilang hisayran ngano nga dako kaayo ang differensya sa presyo sa mga tambal nga gibaligya sud sa tambalanan kon itandi sa anaa sa gawas.
Sagol komedya, si konsehal Goking nag-ingon nga ang tawong gusto mabuhi, mamatay sa presyo sa mga tambal nga naghatag sa dakong problema alang sa mga pasyente. Iyang gidugang pag-ingon nga pangitaan nila kini sa solusyon nga maregulate ang presyo aron affordable ra sa tanan.
Ang proposal ni Goking nahatunong sa announcement ni President Rodrigo Duterte nga mopagula siya sa executive order nga mag-imposar sa maximum retail prices sa moabot 120 ka druga. Sumala pa sa DOH, ang maong listahan sa tambal nag-apil na sa para hypertension, diabetes, cardiovascular disease, chronic lung disease ug major cancers.
Gitakdang motambong sa himuong imbestigasyon sa Konseho mao ang mga personahe sa Department of Health, Food and Drugs Administration ug sa Association of Pharmacists sa syudad sa Cagayan de Oro.