El Alcalde John Dalipe ya comenda con el mga atleta del “Zamboanga City Karatedo Team” y “Zamboanga City Football Team” quein ta ya gana na de ila cada’y cual concurso.
El Karatedo Team ya gana con el titulo durante el “open Championships” na ciudad de Kidapawan del Agosto 27 hasta 28.
El Football Team ya gana na categoriya de Niños (Boys) del “Philippine Football Competition Regional Group Stage U19” na ciudad de Oroquieta desde Agosto 25 hasta 29.
Si Dalipe ya expresa orgullo y amdmiracion con el mga atleta Zamboangueños quien ta continua lleva honor con el ciudad de Zamboanga na de ila respectiva actividad de deportes.
Ya promete si Dalipe cay el govierno local ay sustene con el suporta que ta dale na mga aleta Zamboangueños para produci atleta de calidad y puede queda igual como canda Hidlyn Diaz y Eumir Marcial.
Si Diaz ya gana medalya de oro y si Marcial ya gana medalya de bronze na Olympics na juego de weightlifting y boxing.
Con mga atleta de Karatedo y Football ya presenta con Dalipe si Dr. Cecil Atilano, el City Sports Development Officer, durante el ceremonya de la bandera del Lunes aga enfrente na City Hall.
El govierno local ta prepara ahora el mga necesaryo documentos para dale incentivo con el mga atleta. (B. Garcia, photo courtesy of City Hall PIO)