Cebu City – Milapas na sa 20 mil ang mga pasyente sa coronavirus disease sa Central Visayas nga naulian tungod sa nadugang nga 43 sa miaging adlaw samtang ang bag-ong mga kaso padayong mikunhod.
Segun sa uwahing bulletin, gipahibawo sa Department of Health o DOH-7 nga miabot na og 20, 073 ang recoveries.
Ang 43 nga bag-ong naayo gilangkoban sa 25 sa Cebu province, siyam sa Cebu City, ug unom sa Mandaue City.
Nunot niini, ang gidaghanon sa aktibong mga kaso sa rehiyon naa sa 913.
Ang aktibong mga kaso nagpasabot nga ang pasyente nag-antos pa sa SarsCov-2, ang virus nga hinungdan sa Covid 19.
Dunay duha ka natalang patay sa virus sa rehiyon sa maong adlaw sa lalawigan sa Sugbo.
Sa pikas bahin, ang DOH-7 nakatala og 67 ka bag-ong kaso sa Central Visayas diin 3 sa Cebu City nga sa sayo pa, giila nga epicenter sa virus outbreak.
Ang ubang kaso gikan sa probinsiya sa Sugbo nga mitala og tulo; Bohol, 19; Negros Oriental, 38; usa sa Lapu-Lapu ug tulo sa Mandaue City. (Jhon Tadlip/JTY)
(Source & Photo: DOH Central Visayas)