Maayong balita alang sa mga mahiligon sa dula nga Sepak Takraw tungod kay ipahigayon dinhi sa dakbayan sa Dipolog ang “7th Mayor’s Cup National Sepak Takraw Championships” karong umaabot Agosto 10 hangtod 13 ning tuiga didto sa Dipolog Sports Center ug Multi-Sport Training Center, tanan nahimutang sa Brgy. Olingan ning dakbayan.
Sumala sa nasayran, adunay lima (5) ka kategoriya ang nasangpit nga pa-ugnat sa kusog, una mao ang Men’s Open, ikaduha ang Women’s Open, ikatulo ang Men’s 40 to 44, ika-upat ang Men’s 45 and Above ug ikalima ang Boys’ 17 & Under.
Kining maong dula ang nasayrang usa sa pinakadakong torneyo sa Sepak Takraw sa nasud nga paga-salmotan sa mokapin kon kulang 400 ka mga partisipantes gikan sa 15 ka mga munisipalidad, 5 ka probinsiya ug 34 ka syudad.
Lakip usab sa motambong mao ang mga ahensiya sa militar nga gilangkuban sa Philippine Army, Philippine Navy, Philippine Air Force ug Philippine Coast Guard uban usab sa tulo ka mga tulonghaan sa kolehiyo nga mao ang Rizal Technological University- Mandaluyong City, Eulogio “Amang” Rodriguez Institute of Science and Technology- Manila ug Polytechnic University of the Philippines- Manila.
Gikatakdang himuon ang pormal nga pagbukas sa “7th Mayor’s Cup National Sepak Takraw Championships” sa Agosto 10 sa alas 9:00 ang takna sa kabuntagon didto sa Dipolog Sports Center.
(Source: Dipolog City Government Facebook page)